元朗股神 – 曾錦安

自沙士後股市拾級而上，牛市已近四年多，可謂雞犬皆升，造就大批街坊股神浮面。如曾錦安，憑貼中一隻富士康勁賺逾百萬元，深受街坊擁戴，被封為「元朗股神」；而綽號「巴菲陳」的荃灣散戶陳志強，亦因揀股了得，成為股友明燈；還未計在網上稱王的一眾投資專家及博客。

牛熊角力，後市如何依然難料，但肯定的是，港股風高浪急，缸邊搵食越見兇險，一眾「股神」能否經得起考驗，且拭目以待。元朗股神曾錦安
簡歷：預科畢業，曾任遠東銀行股票及外匯交易員，現任宏利保險分組經理
成名作：去年炒賣工業股富士康(2038)及其末日認購輪，一鋪勁賺過百萬元
現時心水股：新宇亨得利(3389)、精熙(2788)、交行(3328)及大快活(52)
位於元朗大馬路，樓高十二層的匯豐大廈，逾半租客皆為證券行。不論投資初哥、全職炒家，以至於股海浮沉的師奶，每天都會來此聚腳，或賽後檢討，或交流「獨家猛料」。
不過，近年最熱蒲點，首選頂樓的凱基證券，皆因街坊口中的「元朗股神」，經常到此打躉，吸引大批「粉絲」慕名而來。記者向凱基的散戶陳太打聽，她即說：「哦，呢度個個都識佢！不過佢唔係日日嚟，多數係期指結算日先見到佢。」

「元朗股神」名叫曾錦安，最為街坊津津樂道的事蹟，是他於去年初預言工業股富士康必成大器。他由股價七元時開始入貨，再下注相關的末日認購輪，直至今年八月該股被納入恒指，之後高見廿七元時，才於高位賣清，埋單賺逾一百萬元。
徒弟遍及老中青
上週記者邀約他採訪，凱基的職員特別為他安排會客房間，盡顯江湖地位。提到富士康，曾錦安說：「我睇佢招股書，三大手機龍頭Nokia、Motorola同Sony Ericsson都係佢嘅客，市盈率先係十幾倍，（股價）肯定會上。」

證券行內，上上下下，都尊稱曾錦安一聲「師傅」。記者與他於元朗街頭閒逛，每隔廿步便有熟人向他打招呼；到餐廳午膳，又有人主動獻殷勤，幫他等位。「有人話同我喺元朗行街，好似區議員落區咁。」
連今年七十六歲、炒股幾十年的散戶老李，也自認是其徒弟。一個月前，老李聽從「股神」指點，於一元買入創富生物科技（340），賺了五、六仙便沽貨獲利，但上週該股已攀至一元七角。
「你哋咁冇耐性，賺唔到大錢㗎！次次賺少少，一鋪輸清光，最後咪益咗證券行！」西裝筆挺、四十出頭的曾錦安如老豆教仔般道，然後即時致電經紀掃入五萬股，型盡全場。老李被罵得頭耷耷，也不敢駁嘴，反而他間中會叫太太煮撚手咖喱，以饗嗜辣的恩師。

捕捉大戶腳影

曾錦安教人投資，首重做功課，例如研究管理層的往績、業務前景，最忌聽信消息。「最重要係靠眼做嘢，唔好用耳仔。」揀股，則起碼要識分辨庄家股和基金股，他說：「庄家股靠打樁托高個價，吸完水就沽死你；基金股唔同，有幾個fund揸住，無咁易冧。」

學好基本功，便可進深一層，捕捉大戶腳影。他說：「好似富士康喺五、六月時急跌至十五蚊，原來佢有大批 call 輪到期，肯定係大戶質低佢。於是我再掃貨，結果轉頭又升番上去。」

不過，曾錦安坦言，他最殺食的秘技，是其累積廿年的炒股觸覺：「講唔到俾你聽，可以話係捉心理，又可以話係經驗。」記者不斷追問，始終問不到就裡。在旁睇實股票機，尚未拜師學藝的警察水哥深信，曾錦安應有獨門秘方：「我平時見佢入啲位真係好準，我諗佢有條formula（方程式）。不過梗係唔會話晒俾你知。餐廳秘製牛腩煲，都唔會話你知個配方啦！」

八七身家輸光

「股神」留有一手，皆因今日練就一身武功，背後有血有淚。話說曾錦安中七畢業後，曾任職遠東銀行，學識炒股。怎料遇上八七股災，一鋪輸掉辛辛苦苦儲下的十萬元老婆本。「嗰幕真係歷歷在目，我四千點時揸張期指，股災跌停板四日，一開市個個蒲住喺股票行，無人出聲，睇住成朝三千九、三千六一路跌，結果去到二千點先平到倉，蝕足十萬元。」
身家由零開始過，更加添他的淘金慾望。於是，他告別月薪二千元的銀行工，投身當年市道甚旺的汽車經紀行業，「一開始年薪就有五、六萬，幾年就儲夠錢結婚。」至九四年，他贖回自住物業，心思思重出「缸湖」，還開始研究更複雜的期權。
自小是天主教徒的他，不諱言炒股如賭博：「有時你諗咩都無用，最緊要係個市就唔就。」事實上，他亦賭運亨通，九一一事件前，他估恒指會插水，揸了十張認沽期權，竟真的撞正恐怖襲擊，立即發過豬頭，「當然我預計唔到九一一啦！但嗰次跌咗成幾千點，一鋪賺咗五十萬。」
雖然曾錦安自言現時於股市搵銀，比起做保險賺得更多，但他認為有份正職，更有利炒股：「成日望住個市，反而唔 夠冷靜，會做錯決定。」
問他後市，他認為十月股災只是大戶放的流料，不會發生，升勢可持續至年尾，但下年則較兇險。「我相信股災前必有妖孽，當街市賣菜婆都同你講股票，你咪知咩事囉！」